المصريون يسخرون من امتحانات الـ"تابلت": "السيستم واقع"

في اليوم الأول لامتحانات طلاب الصف الأول الثانوي في التجربة الأولى لاستخدام "الجهاز اللوحي" (تابلت)، اشتكى الطلاب في محافظات مصرية مختلفة من أن "السيستم واقع" (خلل في النظام)، مما تسبب في عدم أداء الامتحان في موعده المحدد عند التاسعة صباحاً وتأجيله إلى حين إصلاح المنظومة الإلكترونية.

وقررت مدارس محافظتي القاهرة والجيزة خروج جميع طلاب الصف الأول الثانوي بالنظام التراكمي الجديد بعد فشل تحميل امتحان اللغة العربية على الأجهزة اللوحية.

الخبر أثار سخرية مستخدمي مواقع التواصل الاجتماعي من المتابعين والطلبة.

تساءل حاتم خضر: "في أول امتحان التابلت التجريبي لأولى ثانوي في اللغة العربية "السيستم واقع"... ومعلمون في مديريات التربية والتعليم للطلاب: "إذا استمر الأمر هكذا أكملوا الامتحان في البيت!"، ماذا لو أن هذا العطل حدث في امتحان آخر العام؟".

وكتبت ريهام رضا: "(السيستم واقع)، الجملة المشهورة المُرتبطة بكُل منظومة، تَفشَل دائمًا في خدمة المصريين! لا تنتظر التطوير بمنظومة داخل مصر، طالما أن الكبار القائمين عليها فاسدون وفاشلون في التخطيط. بالتبعية النتيجة هي الفشل والإحباط. #وقال_إيه_السيستم_واقع #منظومة_التعليم_مافيش_فايدة #تحيا_مصر_3مرات".

وعن التهم الجاهزة كتب محفوظ عبد الحليم: "الإخوان يعطلون التابلت. لعله يكون عنوان اليوم السابع أو عنوان حلقة الحقير شبيه القرد".

وتحدث علي عن المشكلة الأساسية حسب رؤيته: "والله كان الأهم من إن يكون في تابلت، إن فكر وطريقة التعليم نفسها تختلف، وتبقى قايمة على البحث والمطالعة والنقد وتعدد الآراء. التابلت نفسه ماكنش هدف في ظل بلد زي مصر ببيروقراطيتها ونظام تعليمها".

وكتبت الطالبة بسملة بركة: "١- الشبكة وقعت وهانفتح من data التابلت وقولنا ماشي، ٢- نكتب الكود ومايرضاش يكتب قولنا ماشي، ٣- الامتحان مش راضي ينزل وهو المفروض من الساعة ٩ نكون بنمتحن وعدّيناها، ٤- كمان بقى نروّح ونشوف أصلا هيفتح معانا لما نروح ولو مفتحش يبقى علينا خير!! كدة هبد بقى".

وأضافت منة: "أيوه يعني إيه ننزل ونروح المدرسة على أساس إننا نمتحن الزفت، ويكون السيستم واقع ونفضل قاعدين لحد الساعة 12 وبعدين نمشي؟ هو دا النظام الجديد اللي هما عايزين يطبقوه يعني!!! ناقص إيه تاني يا منظومة تعليمية فاشلة؟؟!!".

وسخرت هديل: "تدخل بنك السيستم واقع يا فندم، تدخل مكتب أي خطوط اتصالات السيستم واقع يا فندم، تدخل تخلّص ورقة من الحكومة السيستم واقع يا حضرات، تدخل تمتحن ثانوية عامة بالنظام اللي العالم كله باصص علينا فيه، الله أكبر وحاسدنا السيستم واقع، يا ولاد جمهورية السيستم واقع ولا مؤاخذة".

وطلبت تهاني لاشين المساعدة من متابعيها: "أخويا من ساعة ما النظام اللي يبان إنه كويس ده عنده اكتئاب، ومكنش عنده أي أمل، وحقيقي طول الوقت بنصبّره إن في أمل، النهاردة أخد التابلت وراح يمتحن، الامتحان اتلغى عشان السيستم واقع، ماعندناش سيستم أصلا، وغالبا مافيش امتحانات السنة دي، وفي الحقيقة أنا حرفيّا نفسي أشوف له منحة بره، أي حاجة تخرّجه من هنا لو حد يقدر يساعد بأفكار يقول لي".