كورونا يسيطر على أحاديث الفلسطينيين على "فيسبوك"

يسيطر الحديث عن فيروس كورونا المستجد على منشورات رواد "فيسبوك" في الأراضي المحتلة، وتتنوع التعقيبات بين تنبيه وإرشاد إلى أمنيات مع روح فكاهية، ومتابعة الأخبار والمؤتمرات الصحافية، فيما دخل الغناء في الموضوع.

وسيطرت منشورات حول كورونا على "فيسبوك" نتيجة الخوف والهلع، وبدلت سريعاً موضوع الانتخابات وتشكيل الحكومة في إسرائيل، وحتى التعليقات عن يوم المرأة العالمي.

وكتبت دكتورة هنيدة غانم، مديرة مركز مدار، على صفحتها: "يا الله الانسان شو بيقدر يلاقي أمل في الكوارث، خذوني أنا مثلا إنسانة بشكل عام متشائمة. بس مع الكورونا صرت كلي أمل وترقب إنه ينهار اقتصاد اكم شركة واكم دولة. وعم بدعي الصراحة عليهم (الهي يصيروا يشحدوا عبواب الجوامع وما يلاقوا حدا يقلهم هذا شيكل). قادر يا كريم!".

وحذر الناشط مصطفى ريناوي وكتب: "كل واحد رجع من البلاد المذكورة بتعليمات وزارة الصحة على إنه الرجوع منها بلزم بالحجر الصحي واللي راجع من بيت لحم، بيت ساحور، بيت جالا وأريحا.. وملتزمش بالحجر الصحي وقاعد يلف بين العباد واللي عنده شك بحالة مرضية ومش مخبر أي جهة مخولة بالفحص..هذا مش بس مستهتر، هذا ممكن يتحول لقاتل. وبعدين مع الهبل واللامبالاة في الموضوع؟ إنه نمزح بمواقع التواصل الاجتماعي هذا عادي وطبيعي ومحدا إله عندك.. بس إنه ما بدك تحبس حالك بالبيت وتلف عالناس وتزيد إمكانية إصابتهم، هذا مش شأنك لحالك! أنا عندي أقارب وأحباب كبار بالسن وفي من إلي عندهن حالات مزمنة مثل السكر والربو وغيره، هاي ناس أنا بحبها وبديش أخسرها ولا إنها تتعب لساعة وحدة حتى، أنا اليوم بروحش عند ستي ووصلتلها إنه مش رح أزورها لفترة خوفا من أنه بأي لحظة ممكن ألقط الفيروس! وكل واحد منا، حوالي ناس بحبهن وبدش يخسرهن! يعني لازم تصير حالة وفاة عشان نرتعب ونصدق ونبطل نتهبل عالموضوع عالأرض..بالعالم الإفتراضي محدا إله عندك، بس عالأرض مبله!

وكتبت المخرجة سهى عراف ونشرت فيديو المؤتمر الصحافي:" إشي بيضحك وببكي بعد ما نبه إنه ممنوع المصافحة والتقبيل وبعد انتهاء المؤتمر أول واحد صافح الناس هو الناطق بلسان الحكومة الفلسطيني. مرفق المؤتمر".

ونشر الدكتور عمار أبو قنديل:" المريضان رقم 32 و34 من منطقة المركز، وجدا بالقرب من مدينة باقة وداخل قرية يركا ! للنشر والتعميم! من وجد في هذه المناطق وفي هذه الساعات، عليه الدخول حالًا للحجر الصحي، وفي حالة الشعور بعوارض حم، سعال أو صعوبة في التنفس الإتصال على 101! عدم الاستهتار والالتزام بالتعليمات يحمي غيرك ويحميك! - في تاريخ 2.3 بين الساعات:

10:30-11:00 سوبر ألونيت محطة الوقود "دور ألون" على شارع طريق 6 متجهة شمالًا بالقرب من تقاطع مدينة باقة.

11:30 - 12:30 مساءً كرميئيل - شارع أنكور.

12:30-13:30 سوبر ماركت "مركازا" قرية يركا.

13:30-14:30 مطعم "برجر اند ستيك" في مركز BIG في قرية يرك"..

وكتب البروفيسور عزيز حيدر على صفحته: "جميع الحكومات، خاصة الديكتاتورية تقول في كل مناسبة وفي أية محنة لدينا الجهوزية".

ونشر المطرب زهير فرنسيس فيديو له يغني للكورونا: "أغنيه مقتبسه عن الأستاذ الرائع إلي أخيراً توصلت إلى أسمه الأستاذ جورج مجدلاني من لبنان".