إسلام جاويش "سوابق مستجد": هفضل أرسم أفكاري

كتب رسام الكاريكاتير المصري، المخلى سبيله من النيابة، إسلام جاويش، بياناً عن وقائع احتجازه 24 ساعة بتهمة إهانة الرئيس المصري، عبد الفتاح السيسي، والنظام.

 

بدأ جاويش، الذي وصف نفسه بـ"سوابق مستجد"، رسالته بالقول: "شكرًا لكل واحد وقف جنبي، وكل واحد تضامن مع الموضوع، وبشكر رسامي الكاريكاتير كلهم على موقفهم، والكُتاب ونقابة الصحافيين والفنانين والحقوقيين والإعلاميين وكل من نشر بيانات تضامنية والجمهور والأصدقاء، واللي طعن واتهمني بدون وجه حق ربنا يسامحه".

وعن تفاصيل القبض عليه، قال جاويش "الساعة 11:30، كنت المفروض إني رايح معرض القاهرة للكتاب لحضور حفل توقيع أحد الأصدقاء وحفل توقيع خاص بي، وكنت موجود في مقر الشركة اللي أنا شغال فيها. الساعة 12 دخل مجموعة من ضباط مباحث المصنفات وبدأت تفتش المقر وتصوره، فحصوا أجهزتي الخاصة وبعدين أجهزة الشركة، سألوني على بعض الأشخاص في البداية، ده كله وأنا ماشوفتش أصلا أمر النيابة ولا عارف هما عايزين مين بالأخص. سألني أكبر الضباط سنًا عن اسمي وعملي وقلت له إني إسلام جاويش وبشتغل رسام كاريكاتير وعندي مشروع صغير هنا اسمه (الورقة) وخليتهم يتفرجوا على حاجات من شغلي".

وتابع جاويش: "الضابط خد بطاقتي الشخصية، وسألني: هل لمشروع الورقة ترخيص؟.. قولتله ترخيص إزاي يا فندم؟ قالي: أنت بتدير موقع بدون ترخيص.. وحاولت مرارًا إني أفهمه إنها صفحة فيسبوك مش موقع أصلًا. سألني بعدها عن المحتوى الإخباري، قولتله مليش علاقة بيه برضه وكل معلوماتي عنه إنه متوقف تمامًا من شهور".

"بعد فحص الأجهزة لقى عليها بعض رسوماتي وهو بيشوفها قاللي: أنت بترسم إسقاطات سياسية. أنا مش عارف أصلًا هو شايف إيه علشان بيكلمني من ورا الشاشة. فقولتله بالنص: إن دي أفكار في الشأن العام وإيه مشكلتها؟ ثانيًا إن اهتمامي بالأفكار اللي تشدني كرسام كاريكاتير، أنا مش شايف حضرتك بتدور في إيه وأعتقد إن في كاريكاتيرات لرسامين تانيين غيري لأن الجهاز اللي حضرتك بتفحصه جهاز شركة ومش جهازي الشخصي أو اللي برسم عليه. قاللي لا دي سياسية وبتاعتك من الورقة والـsign بتاعتك واضحة زي الشمس أهو"، بحسب جاويش الذي أكد أن هذا الحوار أعقبه أمر من الضابط بـ"حرز الجهازين وجهاز راوتر، رغم أن الشركة فيها أكتر من راوتر، ونزلت معاهم أنا والمدير المالي للشركة اللي أخد بطاقته هو كمان".

Facebook Post

أما عما دار في قسم أول مدينة نصر، فقال جاويش "في الساعة 1 تقريبًا اتجهنا لقسم أول مدينة نصر مع مجموعة ضباط مباحث المصنفات، وبعد ما استنيت شوية بره رجّعوا البطاقة للمدير المالي وقالوله امشي  وقالوا إن إسلام هيستنى معانا، قُلت ماشي.. دخلت أوضة وكان فيها اتنين ضباط من اللي كانوا مرافقين للحملة.. وقالولي بص على أقوالك وامضي.. بصيت على الأقوال لقيت مكتوب إني بدير موقع بدون تراخيص وعندي أجهزة كومبيوتر بدون ترخيص وإني بصمم غرافيك على برامج غير مرخصة! وإني برسم كاريكاتير فيه إسقاطات على رموز الدولة، دا كله في هيئة أسئلة ومتجاوب عليها كمان".

واستطرد جاويش: "قالولي لو حابب تعدل في إجاباتك عدل، قولتلهم أنا ما اطلعتش على المحضر من الأساس. قالولي مش مهم المحضر المهم أقوالك، قولتله يا فندم أنا مبفهمش في القانون ومش همضي إلا في وجود المحامي. بعد شوية محاولات في إقناعي بالإمضاء، وإني لو مماضيتش مش هيبقى في صالحي، قاللي خلاص هكتب محضر من أول وجديد، وهقول إنك رفضت الإمضاء وده مش في صالحك. بعد الكتابة لقيتهم بيقولولي مبروك يا إسلام بابتسامة".

وأكد رسام الكاريكاتير، أن تغيير التهم هو ما دفع صفحة "الورقة" لتغيير البيان المنشور عليها، بعدما اختفى اتهام "رسوم مسيئة بإسقاطات سياسية"، كما أكد "هفضل أرسم أفكاري.. مش هأبطل رسم، وهكمل اللي أنا حابه وهفضل شغال فيه، وأنا لا بطبّل لحد ولا بشتم حد، ولا منحاز فكريًا لحدّ  وليا آرائي سواء الفكرية أو السياسية الخاصة، ولا متطرف في الحوار ولا بدعي البطولة والمثالية".

اقرأ أيضاً: أبرز 9 رسومات ساخرة رداً على اعتقال إسلام جاويش